Vawiin 29th July, 2024
hian BJP Mizoram chuan Karthar inhlanna leh Political Session neih niin, Pu C Zohmingthanga, BJP Aizawl District Treasurer-in inkhawm a kaihruaia, Pu Darlianthanga, State Core Group Member-in hunserh hmangin, Pu Vanlalhmuaka State President-in thusawina hun a nei bawk.
Pu Vanlalhmuaka BJP Mizoram State President chuan, “Union Budget Discussion hun neih tur a ni a, he hunah hian kan sawi ho ber tur chu Mithiam te’n an sawi piah lamah, Mizoram in eng nge kan lo hlawkpuina tur ni ang? tih hi kan sawi ho tur pawimawh ber a ni dawn a ni. BJP Sorkar chuan 2014 aṭanga Budget kan en let chuan a dang chho zel a, kan hmalakna a kan tihhlawhtlin tawhte kalsanin tih tur thar, hmasawnna thar hmel kan hmuh theihna tur Budget ah hian dah chhoh zel a ni,” a ti.
Pu Vanlalhmuaka chuan, “Mizoram hian MLA term 4/5 tlin ai chuan Mizorama mi retheite leh kuthnathawktute dinchhuahna tura lungphum phuma term khat MLA nih pawh a ṭha zawk. Mizoram MLA-te hian MLA nih hi kan duh tawk mai ṭhin avangin Mizoram chu State rethei thawhchhuah nei lo, Chawmhlawm ni si chapo kan ni ringawt mai hi a zahthlak takzet a ni. Central Budget kan zir chian a ngai a, Budget mila kan kal thiam a, kan inher rem thiam a pawimawh takzet a, Kan State a kan Manifesto mila Central ah Sum zuk dil ngawt chi a nilo tih hi kan hriat a, Central zai ngai a, kan mamawhte Budget mila kan hai chhuah a ngai a ni,” a ti.
Pu Hmuaka chuan sawi chhunzawmin, “kan thuziak mi te’n State dang Kristian pawh nilo CM-te hnathawh ṭhat thu Mizoram mipuite hnenah an ziak kur duah a, kan State CM hnathawh ṭhat erawh ziah tur an hre lo thung a ni. Kristian ram hian zir tur kan ngah hle mai. Kan tih tur awm tak ringlo mite’n an tih tlat chuan kan Kristianna hian keimahni ngei pawh min hnehlo tihna a ni a, kan in enlet a ngai hle a ni. Tun Union Budget 2024-2025 thar ah pawh Insakna tur budget a awm a, hei hi a nihna ang taka kalpui ve tawh a, Mizoram hmel ti ṭha tura kan hman thiam ve a ṭul ta hle a ni,” a ti a.
Pu Hmuaka chuan, “kan zir thiamna hmanga dawhkan aṭanga hma la a, sawi ngawt lovin, a Field ah eng nge kan mamawh leh kan harsatnate enfiah a, kan hmasawnna tur thilte a taka kalchilha Kuthnathawktute khaichhuahna tur tak tak ngaihtuah turin Mizoram Sorkar pawh kan inbuatsaih a ngai a ni,” a ti bawk.
Inkhawm ah hian Pu Malsawmtluanga, State General Secretary chuan Union Budget Discussion Dt 31st July, 2024-a Aijal Club-a neih tur chungchang report a pe bawk.
Source ;- BJP Mizoram
